Babbar Ƙungiyar haɗa kan al’ummar Musulmin Najeriya Jama’atu Nasril Islam, ƙarƙashin jagorancin mai alfarma Sarkin Musulmi, Dr Muhammad Sa’ad Abubakar, CFR, ta ce ta samu mummunan labari wanda ya dimauta ta na satar daliban GSSS, Kankara, jihar Katsina, bayan harbin jami’an tsaron a bakin makarantar da misalin karfe 10:45pm a ranar Juma’a.
Da yake jawabi dangane da wannan Iftila’in Dr. Khalid Abubakar Aliyu, babban sakataren JNI, a wata takarda, ya ce wannan daya ne daga cikin miyagun hare-haren da ‘yan ta’adda suka kai, bayan kisan Zabarmari da ya auku babu dadewa.
“Wannan ya kara tuna mana da satar ‘yan matan Chibok da na Dapchi na jihar Borno da Yobe a arewa maso gabashin Najeriya, kuma hakan fami ne a kan ciwo.”
“Za mu cigaba da tambaya: Yaushe ne talakawa za su cigaba da rayuwa cikin tsaro? Yaushe ne gwamnatin tarayya da na jihohi za su cigaba da sukar ta’addanci ba tare da daukar mataki ba? Shin gwamnati da jami’an tsaro sun dimauce ne ta yadda basa iya kulawa da rayukan al’umma?
“Shin akwai wasu sirruka ne da gwamnati take boye wa jama’a? Irin wadannan tambayoyin za su cigaba da yawo a zukatan ‘yan Najeriya da sauran jama’a. Al’umma za ta cigaba da was-wasi a kan gwamnati.”
“Abin ban mamaki a nan shine yadda aka kai hari cikin jihar kuma a lokacin da shugaban kasa yake cikinta. “Shin ‘yan ta’addan har sun samu kwarin guiwar kai hari a gaban gwamnati ko kuma jami’an tsaro kenan?
Hakan yana nuna cewa kwanan nan ‘yan bindiga za su fara mulkar wasu garuruwa kuma su dinga yin yadda suka ga dama. Alamu sun nuna cewa akwai manyan jami’an tsaron da ba su son wannan tashin hankalin ya kare kenan.
Yace idan har ‘yan bindigan sun je da baburansu har suka kwashe daliban, ta yaya za a yi har su gama wucewa amma jami’an tsaro ba su gano su ba? Ya aka yi ‘yan ta’addan suka dauki tsawon lokaci suna kwashe yaran, kuma suka tsere dasu ba tare da an sani ba?
