Gwamnan jihar Katsina, Rt Hon Aminu Bello Masari ya umarci ‘yan jaridar da ke aiki a jihar da su ji tsoron Allah wajen sauke nauyin da ke kansu.
Gov Masari ya ci gaba da cewa ba shi kadai ne mutumin da za a daure a gaban Allah ba a ranar gobe kiyama yana mai cewa duk jikin da ke da nauyi komai kankantarsa to shi ma za a daure shi.
Gwamna Masari ya fadi haka ne yayin da yake bude taron karawa juna sani na yini daya kan Inganta Tsaro ta hanyar aikin Jarida a Katsina.
Taron wanda ya gudana a dakin taro na Hukumar Kula da Ma’aikatun Kananan Hukumomi ya samu halartar ‘Yan Jarida da Jami’an Yada Labarai na Kananan Hukumomi da Kwararru a harkar Yada Labarai daga sassa daban-daban na Jihar.
Ofishin mai ba da shawara na musamman kan al’amuran tsaro ne ya shirya taron karawa juna sani tare da hadin gwiwar Majalisar Jiha ta NUJ.
Gwamna Masari ya bayyana wannan taron karawa juna sani a matsayin a kan kari duba da irin gudummawar da ‘yan jarida ke bayarwa wajen magance matsalolin tsaro da ke addabar wasu sassan jihar a yanzu.
Alhaji Aminu Bello Masari ya bayyana kafafen yada labarai a matsayin babban kayan aiki na tabbatar da tsaro a cikin al’umma saboda haka ya kamata kafafen yada labarai su kasance masu taka-tsan-tsan a duk lokacin da suke bayar da rahoton tsaro.
Ya kuma yi kira ga bukatar ‘yan rahoto su ji tsoron Allah a koda yaushe a cikin rahoton nasu.
Gwamnan ya umarce su da su kasance masu bin ka’idoji na kwararru a koyaushe tare da nuna damuwa kan halayen wasu masu amfani da shafukan sada zumunta da na Intanet kan yada labaran karya.
A nasa jawabin, mai ba shi shawara na musamman kan al’amuran tsaro Alhaji Ibrahim Ahmad Katsina ya ce kafafen yada labarai na da muhimmiyar rawar da za su taka a yakin da ake yi da kalubalen tsaro a jihar, saboda haka Gwamnatin Jiha ta yanke shawarar shirya taron karawa juna sani don cimma burin da aka sa a gaba.
Mashawarcin na musamman ya yabawa Gwamna Aminu Bello Masari saboda samar da dukkanin kayan aikin da ake bukata domin taron karawa juna sani inda ya ce Gwamnatin Jiha za ta ci gaba da yin hadin gwiwa da ‘Yan Jarida wajen magance barazanar tsaro a Jihar.
Shugaban kungiyar ‘yan jaridar Najeriya reshen jihar Kwamared Tukur Hassan Dan Ali ya sanar da Gwamnan cewa dan jaridar a jihar ya kuduri aniyar taimaka wa gwamnatinsa a kokarinta na magance matsalolin tsaro da wasu sassan jihar ke fuskanta.
ZIYARCI SHAFUKANMU NA FACEBOOK DA TWITTER
