- An kama mijin malama yana mata jarabawar neman aiki
Jami’an tsaro sun cafke mijin wata Malama da ya ɓadda kama domin yi mata satar jarabawar neman aikin koyarwa a makarantar gwamnati.
Dubun magidancin ta cika ne bayan bambancin da aka gano a hotonsa da na matar tasa wadda bayananta da hotonta ne ke kan takardun neman aikin da ke Ma’aikatar Ilimi.
Majiyar 
Daily Episode Hausa ta rawaito cewa an kama shi ne a wata cibiyar rubuta jarabawar daukar malamai da ke Kwalejin Ilimi ta Ilesha a Jihar Osun, inda aka mika shi ga jami’an hukumar tsaro ta Civil Defence.
Jami’ar yada labaran Ma’aikatar Ilimin jihar, Roseline Olawumi, da abin ya faru a kan idonta ta tabbatar da cewa mutumin ya je cibiyar ne da nufin yi wa matar tasa jarabawar.
Kwamishinan Ilimin jihar, Folorunsho Oladoyin ya yi tir da abin, yana mai cewa babban abin kunya ne a samu mai son zama malami ya dauko sojan haya ya yi masa magudin jarabawa.
